செம்மொழியும் சோப்புக் கம்பெனிகளும்

செம்மொழி மாநாட்டில் அரங்கேறிய பல நகைச்சுவைக் கட்சிகளில் சில...


கிளம்பிற்று காண் ஜால்ரா கூட்டம்.

''செம்மொழி தங்கமே!
எங்கள் செல்ல சிங்கமே!
உன்னை கும்பிட்டால்
ஊரையே கும்பிட்ட மாதிரி ''
என ஆரம்பித்து வைத்தார் வைரமுத்து.

"கலைஞரின் கபாலக் களஞ்சியத்தில் ஆண் எண்ணங்களை விட ஈரப்பெண் எண்ணங்களே அதிகம். இல்லாவிட்டால் கோபால புர வீட்டை கொடையாக தர முடியுமா? அந்த ஔவையார் காலத்தில் இவர் இருந்திருந்தால் அதியமான் ஏமாந்திருப்பான் '' என்றெல்லாம் கவிதை மழை பொழிந்தது ஈரோடு தமிழன்பன்.

பாடலாசிரியர் விவேகா '' தலைவா, நீ சாக விளக்கு, விதி விலக்கு, அகல் விளக்கு, அகலா விளக்கு. சென்னைக்கு தெற்கே உள்ள திருக்குவளையில் தான் தமிழுக்கு கிழக்கு பிறந்தது'' என கண்டுபிடித்து சொன்னார்.

இதையெல்லாம் பார்த்த வாலி சும்மா விடுவாரா..
''காற்றே கலைஞர் புகழ் பாடி திரி'' என ஆணையிட்டார்.

'' கலைஞரை முத்தமிழ் என்று சொன்னால் நான் முரண்படுவேன். அவர் மொத்த தமிழ். வீடு வரை உறவு, வீதி வரை மனைவி, காடு வரை பிள்ளை, கடைசி வரை கலைஞர் '' என புகழ் படி பொழிந்தார் பழனி பாரதி.

''82 வயது மறைத்த இளைஞனே,
கலைஞரில் இருக்கிறார் கடவுள்.
108 வடிவில் காப்பது கலைஞர் தானே!''
என தன் பணியை செவ்வனே முடித்தார் பா.விஜய் .

இன்னொரு பாடலாசிரியர் கவிதை
''உலகத்துக்கு ஒரு ஐ.நா.; உலகத் தமிழர்க்கு நீ நைனா''

மற்றொரு பாடலாசிரியர்..
''பெண்கள் என்றால் என் நினைவுக்கு வந்தது பிராந்தி பாட்டில்.
இப்போது நினைவுக்கு வருவது பிரதீபா பாட்டீல்'' (என்ன கொடுமை இது)

கவிஞரே உமது கவிதையின் அர்த்தம் மட்டும் பிரதீபா பாட்டீலுக்கு புரிந்திருந்தால் உம்மை பாட்டிலாலேயே ஒரு போடு போட்டிருப்பார். இதை எல்லாம் கேட்பது நமது தலையெழுத்து.


எல்லாவற்றிற்கும் மேலாக வைரமுத்து சொல்லியிருப்பது தான் மனதை மிகவும் தைக்ககூடியது.

''கலைஞர் காப்பீட்டு

திட்டத்தில்
உழவன் சேர்ந்தான்,
உழைப்பாளி சேர்ந்தான்.
அன்னதாய் சேர்ந்தாள்,
பொன்னுத்தாய் சேர்ந்தாள்.
சேராத ஒரே தாய் தமிழ் தாய் '' என.

தமிழை நலிவடைந்தோர் பட்டியலில் சேர்த்து கலைஞரை சரண்புக சொல்கிறார்.
தமிழ் தாயே உன் தரம் இவ்வளவு தாழ்ந்து விட்டதா. என்ன கொடுமையான வரிகள். இவருடைய கவிதைகளை நானும் ரசித்தேன் என்பதை நினைத்து வெட்கப்படுகிறேன்.

தமிழ் திரைப்படங்களுக்கு தமிழ் தலைப்புகள் வைத்தால் வரிச் சலுகை என்றும், தமிழ்நாட்டு கடைகளுக்கு தமிழில் பெயர் பலகை அறிவிப்பால் தமிழ் வளரும் என்றும் நினைப்பது கேலிக்கூத்து. இத்தனை கண்காணிக்க காவல்துறை தடி எடுத்துக்கொண்டு (தொலைக்காட்சி கேமராக்கள் பின் தொடர) கிளம்புவது அதைவிட பெரிய கேலிக்கூத்து. கவிஞர்களே உங்கள் கவிதைகளை ரசிக்கிறோம். கொண்டாடுகிறோம். இந்த மாதிரி கன்றாவிகளை அல்ல. கலைஞரால் எப்படி இவற்றை காது கொடுத்து கேட்கமுடிகிறது என்று தெரியவில்லை.